Beynəlxalq Mətbuat Mərkəzində “Aşıq Şəmşir” Mədəniyyət Ocağı İctimai Birliyinin təşkilatçılığı ilə Azərbaycanın Milli Qəhrəmanı Şahlar Şükürova həsr olunmuş “Bir elin Şahları” filminin nümayişi keçirilib.

Öncə “Aşıq Şəmşir” Mədəniyyət Ocağı İctimai Birliyinin sədr müavini Həbib Misirov çıxış edərək, tədbir iştirakçılarını İctimai Birliyin sədri Qənbər Şəmşiroğlunun adından salamlayıb. Həbib Misirov Milli Qəhrəman Şahlar Şükürovun şərəfli həyat yolu haqqında bəhs edərək bildirib ki, Şükürov Şahlar Əvəz oğlu 17 may 1952-ci ildə Kəlbəcər rayonunun Zülfüqarlı kəndində anadan olub. Rostovda Ali Polis Akademiyasını bitirən Şahlar Şükürov daxili işlər orqanlarında fəaliyyətə başlayıb və polis mayoru rütbəsinə qədər yüksəlib. 1990-cı ildə Tərtər - Kəlbəcər yolu ilə hərəkət edən maşın karvanı Ağdərə ərazisindən keçərkən düşmənin qəfil hücumu ilə qarşılaşmış, bu qeyri-bərabər döyüşdə o, qəhrəmanlıq nümayiş etdirərək, həlak olmuşdur. Bu qanlı hadisə zamanı eyni zamanda Aşıq Şəmşirin qızı Çimnaz xanım da qətlə yetirilmişdir. Bu hadisə zamanı göstərdiyi şücaətə görə Şahlar Şükürova "Azərbaycanın Milli Qəhrəmanı" adı verililmişdir.

Sonra Milli Qəhrəmana həsr olunmuş “Bir elin Şahları” adlı film nümayiş etdirilib. Filmin nümayişindən sonra Kəlbəcər rayon ziyalıları, ictimaiyyət nümayəndələri qəhrəman haqqında, eyni zamanda film barəsində təəssüratlarını bölüşüblər. Çıxış edənlər – Azərbaycan Dövlət Nəşriyyatının baş redaktoru Əlövsət Ağalarov, şair, filologiya üzrə fəlsəfə doktoru Adil Cəmil, şair Zakir Fəxri və başqaları Şahlar Şükürovun hər kəsə nümunə olan ömür yolundan bəhs ediblər, eyni zamanda bu cür tədbirlərin gənclərin vətənpərvərlik ruhunun formalaşmasında müstəsna rol oynadığını xüsusi vurğulayıblar.

Milli Qəhrəmanın qardaşı Malik Şükürov çıxış edərək qardaşı haqqında filmin hazırlanmasında xidməti olanlara, “Aşıq Şəmşir” Mədəniyyət Ocağı İctimai Birliyinə və eləcə də tədbir iştirakçılarına Şahlar Şükürovun ailəsi adından minnətdarlığını bildirib. Malik Şükürov eyni zamanda şəhid ailələrinə göstərilən diqqət və qayğıya görə ölkə başçısına da minnətdarlıq edib.
Tədbirin sonunda Milli Qəhrəman Şahlar Şükürovun ömür yolunu əks etdirən “Bir elin Şahları” filminin ərsəyə gəlməsindəki xidmətlərinə görə Mədəniyyət Nazirliyinin kinematoqrafiya şöbəsinin baş məsləhətçisi Almaz xanım Sultanzadə, Azərbaycan Dövlət Televiziya və Radio verilişləri QSC-nin redaktoru Qorxmaz Şixəliyev və həmin qurumun rejissoru Vəli Səyyadi “Aşıq Şəmşir” Mədəniyyət Ocağı İctimai Birliyinin “Təşəkkürnamə” Diplomu ilə təltif ediliblər.

---

 

Twitter Facebook Google+ Reddit Tumblr LinkedIn Pinterest StumbleUpon Delicious Email More